Ođđajagemánu 29. – 31. beivviid deaivvadedje Suoma, Ruoŧa ja Norgga riikkaarkivárat Guovdageainnus digaštallat oktasaš sámi arkiivaáššiid.
Arkiivvat áimmahuššet sámi vuoiŋŋalaš kulturárbbi. Álgoálbmogiid arkiivvaid almmolaš hálddašeapmi veahkeha olbmuid beassat lagabui iežaset kulturárbbi. Sámi dokumentašuvdna, perspektiivvat ja jienat leat oassin Davviriikkaid demokráhtalaš servodatovdáneamis. Buoridit geavaheddjiid beassanlági sámi kulturárbái lea dehálaš áŋgiruššansuorgi. Eambbo ovttasbargu sámi arkiivaásahusaid gaskka riikkarájiid rastá lea mearrideaddji go galgá bisuhit dan oktasaš sámi kulturárbbi mii mis lea Davviriikkain.
Riksarkivar Inga Bolstad (Norge), riksarkivar Karin Åström Iko (Sverige) og riksarkivar Jussi Nuorteva (Finland) (foto: Arkivverket).
Golmma beaivásaš čoahkkimis leat riikkaarkivára Karin Åström Iko (Ruoŧŧa), riikkaarkivára Jussi Nuorteva (Suopma) ja riikkaarkivára Inga Bolstad (Norga) dál gávnnahan oktasaš mihttomeari movt sáhttá seailluhit ja buktit olámuddui sámi arkiivamateriála Davviriikkaid rájiid rastá. Dál lea áigumuš ásahit oktasaš stivrenjoavkku ja prošeavtta mii galgá bidjat barggu johtui.
Bargu lea joatkkan eará bargguide mat juo leat jođus. Riikkaarkivárat atnet dehálažžan jurddašit ođđa vugiid mielde, vai olbmuide šattašii álkit besset oaidnit arkiivvaid. Dás leat digitála resurssat ja hutkkálaš prošeavttat guovddážis. Čoahkkimis besse riikkaarkivárat oahpásnuvvat prošektii Digital access to Sámi heritage archives. Dát lea EU Interreg-prošeakta mii galgá kártet guovddáš sámi kulturárbearkiivvaid Eurohpás. Prošeakta galgá ráhkadit digitála bálgáid sámi kulturárbái. Ovttasbargu riikkarájiid rastá Davviriikkalaš máhttoásahusaiguin ja riikkaidgaskasaš eamiálbmotarkiivvaiguin galget leat hui guovddážis barggus. Arkiivadoaimmahat Sámi arkiivva bokte Guovdageainnus lea guovddáš ovttasbargoguoibmi dán prošeavttas.
Mii Davviriikkaid arkiivadoaimmahagat áigut iežamet oktasaš barggus maid ovttasbargat Sámedikkiin, Sámi parlamentáralaš ráđiin, eará beroštusorganisašuvnnaiguin ja ásahusaiguin.
Sámi arkiiva Guovdageainnus. (Govven: Arkiivadoaimahaga)