Finnmárkku Digitála Bargobádji: Sámi ja kvena digitála priváhtaarkiivvaid pilohtaprošeakta lea ovdánahttinprošeakta, man Arkiivadoaimmahat doarju ruđalaččat.
Ovdánahttinprošeavtta ulbmil lea ásahit oktasašbálvalusa vuostáiváldit, vurket ja almmuhit digitála priváhtaarkiivvaid, ja bargu álggahuvvo dál pilohtaprošeaktan. Pilohta áigumuš lea vurket sámi ja kvena digitála arkiivvaid. Finnmárku-arkiivvat Romssas ja Finnmárkku fylkkagirjerádju leat ožžon 600 000 kr. arkiivadoaimmahagas virgádit prošeaktajođiheaddji, gean bargosadji galgá leat Sámi arkiivvas. Son gii virgáduvvo galgá earret eará ohcat ja geahččaladdat digitála dihtorprográmmaid maid sáhttá geavahit sámi ja kvena fiila- ja máhppaarkiivvaide.
Pilohta lea ráddjejuvvon sámi ja kvena arkiivvaide, ja dat iešalddis sáhttá mielddisbuktit ahte ođđa hástalusat bohciidit go eamiálbmot- ja minoritehtaarkiivvaid galgá vurket, earret eará sámi ja kvena guoskevaš dieđuid registrerenbarggus. Pilohtabohtosiid sáhttet maid earát geavahit geat vurkejit ja áimmahuššet eamiálbmot- ja minoritehtaarkiivvaid.
