Finnmárku-arkiivvaid ovttasbargoprošeakta Finnmárkku Digitála Bargobádji álggahuvvui čakčamánu 1.beaivve. Arkiivadoaimmahat lea juolludan ruđa virgádit Lasse Andreas Kvernmo Valkeapää prošeaktajođiheaddjin logi mánnui.
Prošeavtta váldoulbmil lea ovddidit oktasašbálvalusa vuostáiváldit, vurket ja almmuhit digitála priváhtaarkiivvaid Finnmárkkus, ja Lásse bargun šaddá ohcat ja geahččaladdat dihtorprográmmaid maid sáhttá geavahit go digitála priváhtaarkiivvaid galgá vurket, vuostáiváldit ja almmuhit Digitálaarkiivvas.
Lásse lea čađahan bachelor gráda historjjás Norgga árktalaš universitehtas, UiT. Son lea bajásšaddan Guovdageainnus, ja sus lea bearašduogáš sihke suoma ja norgga beal Sámis. Son máhttá sámegiela, suomagiela ja dárogiela, mii lea stuora ávkin prošektii, danne go prošeakta lea ráddjejuvvon sámi ja kvena fitnodat- ja organisašuvdnaarkiivvaide.
Dat iešalddis sáhttá mielddisbuktit ahte ođđa hástalusat bohciidit go eamiálbmot- ja minoritehtaarkiivvaid galgá seailluhit, earret eará sámi ja kvena guoskevaš dieđuid registrerenbarggus. Prošeaktabohtosiid sáhttet maid earát geavahit geat vurkejit ja áimmahuššet eamiálbmot- ja minoritehtaarkiivvaid.
Lásse galgá maid čohkket dieđuid man ollu ja makkár digitála priváhtaarkiivvat gávdnojit juo museain, arkiivaásahusain ja girjerádjosiin Finnmárkkus. Dat sáhttet leat elektronalaš čoahkkinbeavdegirjjit, áššebáhpirat, reivvet jna. servviin ja fitnodagain maid olbmot leat addán ásahusaide ovdamearkka dihte muitosákki dahje e-poastta bokte.
Sámi arkiiva mii galgá doaibmat regionála vuorkán, galgá čađahit dán pilohtaprošeavtta. Dat lea lunddolaš dan sivas go Sámi arkiivvas, mii lea oassin Arkiivadoaimmahagas, lea dárbbašlaš gelbbolašvuohta ja fágamáhtu digitála seailluheamis ja vurkemis, mii prošeaktabargui lea dehálaš. Dasa lassin lea Sámi arkiivvas vejolašvuohta geavahit fágaidgaskasaš gealbobirrasa Sámi allaskuvllas. Eamiálbmot- ja minoritehtaperspektiiva lea dehálaš, ja Sámi arkiiva lea našuvnnalaš ásahus mas lea ovddasvástádus seailluhit sámi arkiivvaid.
